Зан-модар тавлидгару мураббии инсон ва устоди беназири фарзанд

    Зан-модар тавлидгару мураббии инсон ва устоди беназири фарзанд

            Ба ҳамаи мову Шумо маълум аст, ки дар асоси Қонуни Ҷумурии Тоҷикистон дар бораи рӯзҳои ид ҳар сол 8 март ҳамчун Рӯзи Модар дар қаламрави Ҷумҳурӣ ҷашн гирифта мешавад.

Модар калимаест, ки аҳли башар дар ниҳоди ӯ ҳастии худро мебинанд. Бале, модар вуҷуди муқаддасест, ки ба беҳтарин навиштаҳову нектарин суханҳо меарзад.

Бузургдошти модар ва эҳтирому қадрдонии заҳматҳои ӯ қарзи ҳар яки мо мебошад. Мо дар сурате дар зиндаги комёб мегардем, ки дуои неки модарро гирем, ба қадри ранҷу заҳмат ва дилсузиву ғамхориҳои ӯ расем.

Модар шахсест, ки инсонро меофарад, ба ӯ ҳаёт мебахшад, ӯро дар оғуши гарму пурмеҳри худ мепарварад, аваллин суханҳо ва гузоштани нахустин қадамҳоро ба фарзандаш ёд медиҳад, фарзандашро бо ҳазор нияту орзуҳои нек ба воя мерасонад, шабу рӯз ба хотири роҳату осоиши тифлаш заҳмат мекашад ва намегузорад, ки фарзанди ӯ ранҷу озоре бинад. Вай ҳамеша дар талош аст, ки фарзандаш солиму бардам ба камол расад, соҳиби одобу маърифат, илму дониш ва касбу ҳунар гардад ва дар оянда ба ҷомеъа хизмати шоиста намояд.

Беҳуда нагуфтаанд, ки

Биҳишт эй ҳамдилон зери қудуми модарон бошад,

Ҳама дарди ҷаҳон дар қалби модарҳо ниҳон бошад,

Дуъои ҷони фарзандаш кунад дар ҳар ибодат ӯ,

На дар фикри ғами дунё, на дар моли ҷаҳон бошад.

Яъне дунё дар домони биҳиштии модар парвариш меёбад ва аз ин рӯ башарият ҳамеша аз ӯ сипосгузор мебошад.

Маҳз бо ташаббус ва иқдоми Асосгузори сулҳу ваҳдати миллӣ Пешвои миллат, Президенти Ҷумҳурии Тоҷикистон мӯҳтарам Эмомалӣ Раҳмон дар даврони истиқлолияти давлатӣ мавқеи зан-модар дар ҷомеа баланд бардошта шуд. Иқдоми мазкур боиси дастгири мебошад, чунки маҳз иштироки занону модарон дар идоракунии давлатӣ, пешрафти иқисодӣ, иҷтимоӣ ва фарҳангии давлату миллати мо такони чиддие бахшидааст.

Чихеле, ки ба мову Шумо маълум аст, дар паёми навбатии худ Президенти мамлакат Асосгузори сулҳу ваҳдати миллӣ Пешвои миллат, мӯҳтарам Эмомали Раҳмон ба Маҷлиси Оли изҳор намуданд, ки занону бонувони мамлакат дар татбиқи сиёсати давлат баробари мардон кору фаъолият намуда, дар рушди ҷомеаи демократӣ ва ҳуқуқбунёду дунявӣ саҳми арзанда гузошта истодаанд. Аз ин ҷо бармеояд, ки занон ҳамеша дар меҳвари таваҷуҳи давлату ҳукумати Ҷумҳурии Тоҷикистон қарор доранд.

Махсус бояд қайд намоям, ки дар таъмини адолати судӣ низ нақши занону модарон, аз ҷумла Судяҳои судҳои Ҷумҳурии Тоҷикистон ва кормандони дастгоҳи он аз ҳисоби занон баланд мебошад.

Ба ҳамин муносибати ҷашни бузург модарону хоҳарон ва кулли бонувони Тоҷикистонро бо фарорасии идӣ Рӯзи Модар аз самими қалб табрик намуда, барояшон дар арафаи Наврӯзи фархундапай пеш аз ҳама саломатӣ, сарбаландӣ, хушиҳои зандагӣ, саодатмандию иқболи нек ва умри дароз орзу менамоям. Бигзор хушбахту хонаобод бошанд.

            Раҷабзода С.А.

   Раиси суди ноҳияи Шаҳринав