ҚАЛЛОБӢ ҶАЗО ДОРАД!

Ҳ У К М

АЗ НОМИ ҶУМҲУРИИ ТОҶИКИСТОН

«27»-уми апрели соли 2023                                        ноҳияи Шаҳринав

Суди ноҳияи Шаҳринав

Дар ҳайати раисикунанда:                                                                                              Аюбзода Н.С

Бо котибии:                                                                                                                          Тошев М.А.

Шарофидинзода К.Ш.

Бо иштироки айборкунандаи давлатӣ:                                                                       Қурбон А.Б.

Дар маҷлиси ошкорои судӣ дар бинои суди ноҳияи Шаҳринав парвандаи ҷиноятиро бо айбдории Б.Ғ.А., санаи таваллудаш 02.12.1991 сол, зодаи шаҳри Турсунзода, миллаташ тоҷик, маълумоташ олии иқтисодӣ, оиладор соҳиби 2 фарзанд, пеш суд нашудааст, шаҳрванди Ҷумҳурии Тоҷикистон, ҷойи кор сардори шуъбаи баруйхатгирии техникӣ КДФ «Бақайдгирии Молу Мулки Ғайриманқул» дар ноҳияи Шаҳринав, аъзои Ҳизби Халқии Демократии Тоҷикистон, ҷойи истиқоматаш шаҳри Турсунзода, Ҷамоати деҳоти Қаратоғ, деҳаи  Қаратоғ, нусхаи хулосаи айбдориро рӯзи 18.03.2023 сол гирифтааст, чораи пешгирияш аз 06.03.2023 сол бо забонхат аз маҳалли зист баромада нарафтан татбиқ карда шудааст, дар содир намудани ҷинояти дар банди «а»-и қисми 3-и моддаи 247-и КҶ Ҷумҳурии Тоҷикистон пешбинишударо баррасӣ намуда, ба далелҳои дар маҷлиси судӣ санҷидашуда баҳо дода суд чунин,-

М У А Й Я Н                 К А Р Д:

Судшаванда Б.Ғ.А. дар вазифаи техник — баҳисобгири шӯъбаи техникии КДФ “Бақайдгирии молу мулки ғайриманқул” дар ноҳияи Шаҳринав кор карданаш, моҳи апрели соли 2016 ба ӯ шаҳрванд Д.З.А., истиқоматкунандаи ноҳияи Шаҳринав, Ҷамоати деҳоти Шаҳринав, маҳаллаи Балхак дар хусуси мусоидат намудан ҷиҳати гирифтани шиносномати техникии ҳавлидорӣ, парванда заминсозӣ ва шаҳодатнома дар бораи бақайдгирии давлатии манзили истиқоматии ба номи модараш шаҳрванд Н.А.О., воқеъ дар суроғаи ноҳияи Шаҳринав, Ҷамоати деҳоти Шаҳринав, маҳаллаи Балхак муроҷиат намуд. Б.Ғ.А.  бо истифодаи мақоми хизматӣ, бо мақсади бо роҳи фиреб ва сӯиистифодаи боварӣ тасарруф намудани молу мулки ғайр, ба боварии Д.З.А. даромада, ба номбурда таклиф пешниҳод намуд, ки бар ивази маблағи 8800 сомонӣ дар муҳлати кӯтоҳ шиносномаи техникии ҳавлидорӣ, парванда заминсозӣ ва шаҳодатнома дар бораи бақайдгирии давлатии манзили истиқоматии ба номи шаҳрванд Н.А.О. омода карда медиҳад. Д.З.А. бехабар аз қасд ва мақсади ғаразноки Б.Ғ.А. ба фиреби ӯ бовар карда, ҷиҳати ба охирин пешниҳод намудани маблағи талабшуда розӣ шуд. Б.Ғ.А. қасдан ва бо мақсади ғаразнок, кирдорҳои ҷинояткоронаи худро идома дода аз Д.З.А. дар назди бинои КДФ “Бақайдгирии молу мулки ғайриманқул” дар ноҳияи Шаҳринав моҳи апрели соли 2016 маблағи 8800 сомониро гирифта, танҳо 380 сомонии онро ҳамчун хизматрасонӣ ба бонк супорида, боқимонда маблағи 8420 сомониро ба манфиати худ сарф карда, 27 апрели соли 2016 шиносномаи техникии ҳавлидориро ба номи Н.А.О. омода карда, онро дар деҳаи Қаратоғи шаҳри Турсунзода ба Д.З.А. дода, ба охирон ваъда кард, ки барои омода намудани боқимонда ҳуҷҷатҳои манзили истиқоматӣ кумак мерасонад. Минбаъд Б.Ғ.А. дар вазифаи сардори шуъбаи баруйхатгирии техникии корхонаи дар болозикршуда кор карданаш, кирдорҳои ҷинояткоронаи худро давом дода, бо мақсади ба даст овардани маблағи муфту безаҳмат бо сӯиистифодаи боварӣ, бо қасди умумӣ ва мақсади ягон амал карда, ба маблағи 8420 сомонии аз Д.З.А. гирифтааш қаноат накарда, нақшаи ҷиноятпешаи худро таҳрезӣ намуда, моҳи майи соли 2021 аз Д.З.А. барои мусоидат намудан ҷиҳати омода намудани парвандаи заминсозӣ ва шаҳодатнома дар бораи бақайдгирии давлатӣ ба номи Н.А.О. боз аз охирин овардани маблағи 10 000 сомониро талаб кард.Бо назардошти он ки Д.З.А. имконияти додани чунин маблағро надошт, бо хоҳиши охирин Б.Ғ.А. маблағи талабнамудаашро то 8500 сомонӣ кам намуд ва минбаъд Д.З.А. бехабар аз мақсади ҷиноятпешаи Б.Ғ.А. барои додани маблағ розӣ шуд.Б.Ғ.А. қасдан ва бо мақсади ғаразнок, нақшаи ҷинояткоронаи худро идома дода аз Д.З.А. дар ду ҳолат маротибаи аввал дар назди филиали бонки “Эсхата”-и ноҳияи Шаҳринав моҳи майи соли 2021 маблағи 3500 сомонӣ ва маротибаи дуюм моҳи ноябри соли 2021 дар назди бинои КДФ “Бақайдгирии молу мулк ғайриманқул” дар ноҳияи мазкур маблағи 3000 сомонӣ, ҷамъ маблағи 6500 сомониро гирифта, танҳо 260 сомонии онро ҳамчун хизматрасонӣ ба бонк барои омода намудани парвандаи заминсозӣ ва шаҳодатнома дар бораи бақайдгирии давлатӣ пардохт карда, боқимонда маблағи 6239 сомониро ба манфиати худ сарф кард.Дар маҷмуъ Б.Ғ.А. бо роҳи фиреб аз шаҳрванд Д.З.А. маблағи 15300 сомониро гирифта, аз он танҳо маблағи 640 сомонӣ барои хизматрасонӣ ба бонк пардохт карда, боқимонда маблағи 14660 сомониро ба эҳтиёҷоти шахсиаш сарф намудааст, ки бо ин  кирдорҳои қасдонаи худ ба охирин зарари моддӣ ба миқдори калон расонидааст.

Судшаванда Б.Ғ.А. дар маҷлиси судӣ худашро дар содир намудани ҷиноят пурра гунаҳкор шуморида, пушаймонӣ изҳор намуда, чунин нишондод дод, ки моҳи апрели соли 2016 ӯ дар ҷой кор, яъне дар идораи КДФ “БММҒ” дар ноҳияи Шаҳринав қарор доштанаш, ки ба наздаш ҳамсояаш Н.У. бо ҳамроҳии як шаҳрванд омадаанд. Н.У. фаҳмонд, ки ин шаҳрванд ҷиянаш Д.З. мебошад ва ӯро шинос намуд. Дар рафти суҳбат Д.З. ба ӯ фаҳмонд, ки вай дар ноҳияи Шаҳринав, Ҷамоати деҳоти Шаҳринав, маҳаллаи Балхак истиқомат мекунад. Ҳуҷҷатҳои манзили истиқоматиашон танҳо дар масоҳати 0,13 га ҳуҷҷатгузори карда шудааст. Лекин масоҳати замини онҳо калон мебошад ва онҳо аз солҳои пеш дар ин замини мазкур истиқомат доранд. Замини мазкур ба номи модараш Н.А. ҳуҷҷатгузори карда шудааст. Ҳамин тавр дар рафти суҳбат Д.З. аз ӯ хоҳиш намудааст, ки барои пурра ҳуҷҷатгузори намудани қитъаи замин кӯмак расонад. Ӯ ба онҳо фаҳмонд, ки аввал рафта қитъаи заминро азназар гузаронидан лозим аст. Ҳамин тавр баъди ду рӯз ӯ ба ҳавлии Н.А., воқеъ дар маҳаллаи Балхак рафтааст. Дар ҳавли алакай Д.З. ва Н.У. ӯро интизор буданд. Дар иштироки онҳо ӯ қитъаи заминро чен кард, ки масоҳати умумии қитъаи замин 0,50 га ро ташкил дод. Баъдан Д.З. аз ӯ оиди ҳаққи хизмат барои ҳуҷҷатгузори намудани қитъаи замини наздиҳавлигиро пурсон шуд. Ӯ ба Д.З. фаҳмонд, ки фардо бо шиносномаи ҳавлидорӣ ба ҷои кор биёянд ва дар онҷо оиди ин масъала суҳбат мекунанд. Рӯзи дигар Д.З. бо ҳамроҳии Н.У. ба ҷои кораш омаданд. Аз сабаби зиёд будани шаҳрвандон дар утоқи кори ӯ онҳоро ба берун, яъне ба саҳни ҳавлии бинои корхонаи мазкур баровард. Дар рафти суҳбат ӯ ба Д.З. фаҳмонд, ки ба ивази маблағи 8800 сомонӣ ҳуҷҷатҳои қитъаи заминро пурра омода менамояд. Яъне тартиб додани шиносномаи техникии ҳавлидорӣ, тартиб додани парвандаи заминсозӣ, гирифтани қарори раиси ноҳия оиди вобаста намудани қитъаи замин ва омода намудани шаҳодатнома дар бораи бақайдгирии давлатӣ. Д.З. розигӣ дод ва пас аз гузашти 3 рӯз ба наздаш ба ҷои кор омад ва дар шоҳидии Н.У.  Д.З. ба ӯ маблағи 8800 сомониро дар моҳи апрели соли 2016 дод. Пас аз ин ӯ ба номи Н.А. шиносномаи техникии ҳавлидориро дар муддати як рӯз, яъне сани 27 апрели соли 2016 омода намудааст. Қайд намуд, ки аз маблағи 8800 сомонии гирифтааш ӯ маблағи 380 сомониро ҳамчун хизматрасонӣ ба бонк пардохт намудааст.Бинобар сабаби надоштани қарори раиси ноҳия, ӯ дигар ҳуҷҷатҳои ба Д.З. ваъда кардаашро, тайёр накардаст. Тахминан аввалҳои моҳи майи соли 2016 ӯ Д.З.-ро тариқи телефони мобилӣ ба деҳаи Қаратоғи шаҳри Турсунзода ба наздаш даъват карда шиносномаи техникии ҳавлидориро ба вай дод ва гуфтааст, ки дигар ҳуҷҷатҳоро пас аз гирифтани қарори раиси ноҳия оиди вобастакуни тайёр карда медиҳад. Лекин дар ин муддат ӯ қарори раиси ноҳия, парвандаи заминсозӣ ва шаҳодатнома дар бораи бақайдгирии давлатиро омода накардаст. Ҳаминро қайд намуд, ки қарори раиси ноҳияи оиди вобаста намудани қитъаи замин ба ҳуҷҷатҳои парвандаи заминсозӣ дохил мешаванд. Ҳамин тавр тахминан моҳи октябри соли 2020 Д.З. ба наздаш ба ҷои кор омада оиди боқимонда ҳуҷҷатҳо пурсон шуд. Ӯ ба Д.З. фаҳмонидааст, ки рафта ба номи раиси ноҳияи Шаҳринав бо ариза муроҷиат намояд. Ҳамин тавр баъди чанд рӯз Д.З. ба наздаш омада иброз намудааст, ки модараш Н.А. ба номи раиси ноҳия ариза навиштааст. Ҳамин тавр ӯ дар моҳи октябри соли 2020 маълумот гирифтааст, ки аризаи навиштаи Н.А. ба мутахассиси шуъбаи заминсозии КДФ “БММҒ” дар ноҳияи Шаҳринав Қ.М. вогузор карда шудааст. Ӯ ба назди Қ.М. рафта аз вай хоҳиш намудааст, ки аризаи Н.А.ро ҳарчи тезтар бинад зеро номбурда хешу табораш мебошад. Қ.М. ба ӯ ваъда додааст, ки аризаро дуруст санҷида мебарояд. Баъдан моҳи январи соли 2021 Д.З. ба ҷои кораш омада ба ӯ санад дар бораи вобаста намудани қитъаи замини наздиҳавлигии шаҳрванд Н.А., воқеъ дар маҳаллаи Балхаки Ҷамоати деҳоти Шаҳринави ноҳияи Шаҳринав ва нусха аз қисми харитаи баҳисобгирии давлатии миқдори заминҳои Ҷамоати деҳоти Шаҳринав бо нишондоди ҷойгиршавии қитъаи замини шаҳрванд Н.А. барои гирифтани имзоҳои комиссияи ноҳиявиро дод. Ӯ дар муддати чанд моҳ ба утоқҳои кории ҳайати комиссия рафта имзоҳои онҳоро гирифтааст. Пасон санад ва нусхаро ба Қ.М. дод ва боз хоҳиш намуд, ки ҳарчи зудтар пешниҳоди раиси Кумитаи идораи заминро омода намояд. Баъдан моҳи майи соли 2021 ҳангоми, ки дар ҷои кор қарор дошт ба наздаш Д.З. омада аз ӯ оиди дигар ҳуҷҷатҳо аз қабили қарори раиси ноҳия, парвандаи замонсозӣ ва шаҳодатнома дар бораи бақайдгирии давлатӣ, ки ин ҳуҷҷатҳоро барои омода намудан ӯ низ қаблан ваъда карда буд, пурсон шуда буд. Дар ҷавоб ӯ ба Д.З. фаҳмонд, ки бе қарори раиси ноҳия оиди вабаста намудани қитъаи замин ӯ дигар ҳуҷҷҳоро омода карда наметавонад ва барои ҳарчи тезтар гирифтани қарор ва омода намудани ҳуҷҷатҳо аз вай аввал маблағи 10.000 сомонӣ талаб намуда бо сабаби надоштани ин маблағ аз Д.З. овардани маблағи 8500 сомонӣ талаб намуд. Номбурда розигӣ дод ва баъд аз чанд руз қисми маблағро, яъне 3500 сомониро дар дар назди филиали бонки “Эсхата” дар ноҳияи Шоҳринав,  дар моҳи майи соли 2021 дод. Моҳи августи соли 2021 Қ.М. ба ӯ пешниҳоди раиси Кумитаи идораи заминро оварда дод. Ӯ ҳамон вақт пешниҳоди мазкурро бо санад ва нусха гирифта ба назди раиси Кумитаи зикршуда Ш.Ҳ. рафта аз вай хоҳиш намуд, ки дар пешниҳод имзо намояд. Ш.Ҳ. санад ва нусхаро санҷида баъдан дар пешниҳод имзо гузошт. Баъдан аз ҷониби кормандони Кумитаи идораи замин пешниҳод ва дигар ҳуҷҷатҳоро барои гирифтани қарори раиси ноҳия дар бораи вобаста намудани қитъаи замини наздиҳавлигӣ ба шаҳрванд Н.А. ба раиси ноҳияи Шаҳринав пешниҳод карда шуд. Баъдан моҳи ноябр соли 2021 тариқи телефони ӯ ба Д.З. занг зада гуфт, ки рузҳои наздик ҳуҷҷатҳо омода мешаванд ва боз овардани маблағи 3000 сомониро талаб намуд. Д.З. розӣ шуд ва пас аз гузашти чанд руз ин маблағро дар моҳи ноябри соли 2021 ба ӯ оварда дар ҷои кораш дод.

Пас аз ин санаи 09 июни соли 2022, №310 қарори раиси ноҳия дар бораи вобаста намудани қитъаи замини наздиҳавлигии Н.А. ба имзо расид. 24 июни соли 2022 ӯ ба Д.З. тариқи телефони занг зада гуфт, ки ба Ориён-бонк барои парвандаи заминсози маблағи 1094 сомониро пардохт намояд ва расидашро ба ӯ биёрад. Худи ҳамон руз Д.З. расиди 1094 сомониро ба ӯ оварда дод. Ӯ ҳамон вақт расиди мазкурро ба мутахассиси шуъбаи заминсозии КДФ “БММҒ” дар ноҳияи мазкур Қ.М. дод ва он кас нақшаи қитъаи замини наздиҳавлигии Н.А. ва протоколи дар маҳал муайян намудани сарҳади қитъаи замини наздиҳавлигии Н.А.-ро омода намуда ба ӯ барои гирифтани имзоҳо дод. Ӯ ҳамон вақт ба утоқҳои кории ҳайати комиссия рафта имзоҳои онҳоро дар нақша ва протоколи мазкур гирифт. Баъдан моҳи сентябри соли 2022 ӯ ба Д.З. занг зада фаҳмонд, ки ҳамроҳи модараш Н.А. омада парвандаи заминсозиро гирифта дар шуъбаи бақайдгирии давлати ҳамин корхона оиди гирифтани шаҳодатномаи бақайдгирии давлати ариза нависанд.

Ҳамин тавр рӯзи дигар Д.З. ҳамроҳи модараш ба корхонаи мазкур омада ариза навиштанд ва ӯ ба онҳо фаҳмонд, ки фардо омада шаҳодатнома дар бораи бақайдгирии давлатиро гирифта раванд. Худи ҳамон руз ӯ аз маблағҳои додаи Д.З. маблағи 260,64 сомонӣ дар бонк супорид. Баъдан ба назди сардори шуъбаи бақайдгирии КДФ “БММҒ” дар ноҳияи Шаҳринав К.Ҷ. рафта аз вай хоҳиш намуд, ки шаҳодатномаи мазкурро омода намояд. К.Ҷ. ҳуҷҷатҳои мазкурро санҷида пасон шаҳодатнома дар бораи бақайдгирии давлатиро омода намуд. Пасон худи Н.А. омада шаҳодатномаи мазкурро гирифта рафт. Дар маҷмуъ ӯ аз шаҳрванд Д.З. аз моҳи апрели соли 2016 то моҳи ноябри соли 2021 ҳамагӣ маблағи 15300 сомонӣ гирифта аз ин маблағ 640 сомониашро барои хизматрасонии ҳуҷҷатҳо омода карда шуда дар бонк супорида боқимонда маблағи 14660 сомониро ба эҳтиёҷоти худ сарф намудааст.

Ба ғайр аз пурра худиқрории судшаванда Б.Ғ.А. суд гуноҳи ӯро дар содир намудани ҷинояти зикргашта, бо маҷмуи далелҳои дар маҷлиси судӣ санҷидашуда исботёфта меҳисобад.Чунончӣ:

Ҷабрдида Д.З.А. дар маҷлиси судӣ чунин нишондод дод, ки Тахминан моҳи апрели соли 2016 ӯ бо ҳамроҳи тағояш Н.У.О. ба КДФ “Бақайдгирии молу мулки ғайриманқул” дар ноҳияи Шаҳринав рафтаанд ва ба утоқи кории Б.Ғ.А. даромадаанд ва оиди мушкилиашон ба вай фаҳмондаанд. Б.Ғ.А. дар ҷавоб гуфтааст, ки аввал қитъаи заминро аз наздик дида баъдан маслиҳат мекунанд. Пас аз гузашти 2 рӯз Б.Ғ.А. ба хонааш омадааст ва заминро чен кардааст, ки он 0.50 га-ро ташкил додааст ва гуфтааст, ки фардо ба ҷои кораш биёянд, маслиҳат мекунанд. Рӯзи дигар ӯ бо ҳамроҳи тағояш Н.У.О. ба утоқи кории Б.Ғ.А. рафтаанд ва бинобар зиёд будани одамон дар утоқи кориаш вай онҳоро ба берун  баровардааст ва дар саҳни ҳавлии назди бинои КДФ “Бақайдгирии молу мулки ғайриманқул” дар ноҳияи Шаҳринав суҳбат кардаанд. Б.Ғ.А. ба ӯ гуфтааст, ки бар ивази маблағӣ 8800 сомонӣ қитъаи замини наздиҳавлигиро ҳуҷҷатгузорӣ менамояд, аз ҷумла омода намудани шиносномаи техникии ҳавлидорӣ, парвандаи заминсозӣ, гирифтани қарори раиси ноҳия оиди вобаста намудани қитъаи замин ва шаҳодатнома дар бораи бақайдгирии давлатиро дар муҳлати 1 моҳ омода менамояд. Ӯ ба Б.Ғ. бовар намудааст ва пас аз гузашти 3 руз, яъне моҳи апрели соли 2016 ба номбурда дар шоҳидии тағояш Н.У.О. дар назди бинои КДФ “Бақайдгирии молу мулки ғайриманқул” дар ноҳияи Шаҳринав маблағи 8800 сомониро додааст. Пас аз гузашти як ё ду рӯз Б.Ғ.А. тариқи телефонӣ ба ӯ занг задааст ва ба наздаш даъват кардааст. Худи ҳамон лаҳза ӯ ба деҳаи Қаратоғи ноҳияи Шаҳринав ба назди тағояш Н.У.О. рафтааст, ки Б.Ғ.А. аллакай ҳамроҳаш будааст. Номбурда дар шоҳидии тағояш Н.У.О. ба ӯ танҳо шиносномаи техникии ҳавлидории хонаро ба номи модараш Н.А.ро додааст ва гуфтааст, ки дар рузҳои наздик қарори раиси ноҳия оиди вобаста намудани қитъаи заминро мебарорад ва дигар ҳуҷҷатҳоро низ омода карда медиҳад. Баъдан ӯ рузи дигар ба назди Б.Ғ.А. ба наздаш ба ҷои кораш рафтааст ва оиди боқимонда ҳуҷҷатҳо пурсон шудааст. Б.Ғ.А. ба ӯ фаҳмондааст, ки рафта аз номи модараш Н.А. ба номи раиси ноҳияи Шаҳринав оиди вобаста намудани қитъаи замин ариза нависад. Қайд намудааст, ки ба ғайр аз ӯ боз бародараш Д.Ш. дар хонаи мазкур истиқомат мекунад ва дар хона маслиҳат кардаанд, ки як қисми замини мазкурро ба номи бародараш Д.Ш. ҳуҷҷатгузори шавад. Ҳамин тавр ӯ ҳамон вақт аз кадом корманди МИҲД ноҳияи Шаҳринав хоҳиш намудааст, ки ба номи раиси ноҳия ариза нависад ва он кас аризаро навишта ба ӯ додааст. Ӯ дар ариза имзои модараш Н.А. гирифта онро дар МИҲД ноҳияи Шаҳринав супоридааст. Пасон ба Б.Ғ.А. занг зада фаҳмондааст, ки аризаро дар мақомоти мазкур супоридааст. Ҳамин тавр тахминан моҳи январи соли 2021 мутахассиси КФД “БММҒ” дар ноҳияи Шаҳринав Қ.М. ӯро ба наздаш даъват кардааст ва ба ӯ санад дар бораи вобаста намудани қитъаи замини наздиҳавлигии шаҳрванд Н.А., воқеъ дар маҳаллаи Балхаки Ҷамоати деҳоти Шаҳринави ноҳияи Шаҳринав ва нусха аз қисми харитаи баҳисобгирии давлатии миқдори заминҳои Ҷамоати деҳоти Шаҳринав бо нишондоди ҷойгиршавии қитъаи замини шаҳрванд Н.А.ро дода фаҳмондааст, ки дар ҳуҷҷатҳои мазкур имзоҳои шахсони мутасадиро гирифта биёрад. Ӯ ҳуҷҷатҳои мазкурро гирифта ҳамон рӯз бо Б.Ғ.А. дар утоқи кориаш вохурда ин ҳуҷҷатҳои мазкурро ба вай додааст. Ҳамин тавр тахминан моҳи майи соли 2021 ӯ шиносномаи техникии ҳавлидориро гирифта ба назди Б.Ғ.А. рафтааст ва аз вай хоҳиш намудааст, ки боқимонда ҳуҷҷатҳои мазкурро, ки бояд омода мекард пурсон шудааст. Б.Ғ.А. ба ӯ фаҳмондааст, ки бе гирифтани қарори раиси ноҳия оиди вабоста намудани қитъаи замин дигар ҳуҷҷатҳоро омода карда наметавонад. Б.Ғ. боз илова карда гуфтааст, ки гирифтани қарори раиси ноҳия оиди вобастакунӣ мушкили дорад ва барои ҳарчи тезтар гирифтани ин қарор ва омода намудани дигар ҳуҷҷатҳо боз аз ӯ овардани маблағи 10.000 сомониро ҳамчун ҳаққи хизматаш талаб кардааст. Дар ҷавоб ӯ ба вай гуфтааст, ки ин қадар маблағи калон надорад ва вай инро дида аз ӯ танҳо овардани маблағи 8500 сомониро талаб намудааст. Ӯ боз барои додани чунин маблағ ноилоҷ рози шудааст. Ҳамин тавр моҳи майи соли 2021 ӯ аз ҳисоби пасандозҳои шахсиаш ба Б.Ғ. дар назди филиали бонки “Эсхата” дар ноҳияи Шаҳринав маблағи 3500 сомониро якҷоя бо шиносномаи техникии ҳавлидорӣ додааст ва гуфтааст, ки боқимонда маблағро пас аз омода шудани ҳуҷҷатҳо медиҳад.       Дар ин муддат ӯ як чанд маротиба бо Б.Ғ.А. дар хусуси ҳуҷҷатҳо суҳбат мекардаст ва номбурда иброз менамудааст, ки ҳуҷҷатҳои мазкурро омода карда истодааст.Баъдан моҳи ноябри соли 2021 Б.Ғ.А. ба ӯ занг зада гуфтааст, ки ҳуҷҷатҳо рӯзҳои наздик омода мешаванд ва боз овардани маблағи 3000 сомонии дигарро талаб кардааст. Ӯ боз аз маблағҳои шахсиаш 3000 сомониро гирифта бо Б.Ғ.А. дар ҷои кораш вохурда ин маблағро ба вай додааст.Ҳамин тавр боз аз байн як чанд вақт гузаштааст. Баъдан моҳи июни соли 2022 Б.Ғ.А. ба ӯ занг зада иброз намудааст, ки қарори раиси ноҳия оиди вобастакуниро гирифтааст ва фаҳмондааст, ки рафта ба бонк маблағи хизматрасониро пардохт намояд. Минбаъд ӯ ба Ориён-бонки ноҳияи Шаҳринав рафта аз ҳисоби худ маблағи 1093 сомониро пардохт намудааст ва расиди маблағро худи ҳамон замон ба Б.Ғ. додааст. Тахминан моҳи сентябри соли 2022 Б.Ғ. ба ӯ занг зада гуфтааст, ки модараш Н.А.ро ба ҷои кораш биёрад то ки дар ариза имзо гузорад. Худи ҳамон руз ӯ модарашро гирифта ба КДФ “Бақайдгирии молу мулки ғайриманқул” дар ноҳияи Шаҳринав ба назди Б.Ғ. бурдааст ва номбурда ба модараш ҳуҷҷатҳоро пешниҳод карда имзояшро гирифтааст ва пас аз гузашти чанд рӯз Б.Ғ.А. ӯро ба ҷои кор даъват намуда ҳамаи ҳуҷҷатҳоро аз қабили шиносномаи техникии ҳавлидорӣ, қарори раиси ноҳия оиди вобастакунӣ, шаҳодатнома дар бораи бақайдгирии давлатӣ ва парвандаи заминсозиро додааст. Ӯ ягон маротиба бо Б.Ғ.А. ягон намуд муносибати қарзӣ надоштааст ва ба вай ягон миқдор маблағи пуллӣ ҳамчун қарз  надодааст. Ӯ танҳо маблағи 15300 сомониро ба Б.Ғ.А. барои ҳуҷҷатгузори намудани қитъаи замини наздиҳавлигӣ дода будааст. Инчунин байни онҳо ягон маротиба фаъолияти тиҷорати вуҷуд надоштааст. Маблағи 15300 сомонӣ ин маблағҳои шахсии худаш мебошад ва ба ӯ таалуқ дорад. Ӯ ин маблағҳоро аз солҳои пеш кор карда ҷамъовари карда будааст.Б.Ғ.А. аз ӯ маблағи 15300 сомонӣ гирифта будааст. Аз ин маблағ Б.Ғ.А. маблағи 640 сомониашро ба бонк ҳамчун пардохтҳои боҷи давлатӣ ва хизматрасонӣ супоридааст. Дар рафти санҷиш Б.Ғ.А. маблағи 14660 сомониро пурра ба ӯ барқарор намудааст ва ӯ дар асоси забонхат маблағи мазкурро гирифтааст. Айни замон ӯ дигар нисбати Б.Ғ.А. даъвои пули надорад. Ӯ Б.Ғ.А.ро аз моҳи апрели соли 2016 мешиносад.

Шоҳид Н.У.О. дар маҷлиси судӣ чунин нишондод дод, ки моҳи апрели соли 2016 Д.З.А. ба ӯ иброз намуда будааст, ки қитъаи замини наздиҳавлигиашон ба номи марҳум падараш Д.А. ҳуҷҷатгузори карда шуда будааст ва баъди вафоти падараш ҳуҷҷатҳои хонааш ҳамчун меросхур ба номи модараш Н.А. ҳуҷҷатгузори карда шудааст. Қитъаи замини наздиҳавлигиашон танҳо ба миқдори 0,13 га ҳуҷҷатгузори карда шудааст. Лекин замини онҳо калон мебошад. Аз ҳамин ҳисоб Д.З. аз ӯ хоҳиш намуда будааст, ки ягон шинос барои омода намудан ҳуҷҷатҳои манзили истиқоматӣ дошта бошад кумак расонад. Ӯ ҳамон замон ба Д.З. фаҳмондааст, ки дар ҳамсоягиаш корманди КДФ «Бақайдгирии молу мулки ғайри манқул» дар ноҳияи Шаҳринав Б.Ғ. истиқомат мекунад ва дар ин хусус рафта бо вай маслиҳат мекунанд. Ҳамин тавр рузи дигар ӯ ҳамроҳи Д.З.А. ба КДФ «БММҒ» дар ноҳияи Шаҳринав ба назди Б.Ғ.А. рафта дар утоқи кориаш бо вай вохурда мақсади омадани худро иброз намудаанд. Б.Ғ. ба онҳо фаҳмондааст, ки рафта замини мазкурро чен карда баъдан маслиҳат мекунанд. Баъди ду руз пас ӯ дар хонаи Д.З.А. будааст, ки Б.Ғ.А. омада замини мазкурро чен кард ва масоҳати умумии замин ба миқдори 0,50 га баромадааст. Пасон Б.Ғ. фаҳмондааст, ки рузи дигар ба ҷои кораш омада маслиҳат кунанд. Рузи дигар ӯ бо ҳамроҳи Д.З. ба КДФ «БММҒ» дар н.Шаҳринав рафта дар саҳни ҳавлии бинои корхонаи мазкур бо Б.Ғ. суҳбат кардаанд. Дар рафти суҳбат Б.Ғ. ба Д.З. фаҳмондааст, ки барои омода намудани шиносномаи техникии ҳавлидорӣ, парвандаи заминсозӣ, гирифтани қарори раиси ноҳия оиди вобаста намудани қитъаи замин ва шаҳодатнома дар бораи бақайдгирии давлати маблағи 8800 сомониро биёрад. Д.З. барои додани чунин маблағ розигӣ додааст. Баъди ду ё се руз Д.З.А. маблағи 8800 сомониро гирифта ҳамроҳи ӯ ба идораи КДФ “БММҒ” дар н.Шаҳринав ба назди Б.Ғ. рафтаанд ва дар назди бинои корхонаи мазкур Д.З. дар ҳузури ӯ ба Б.Ғ. маблағи 8800 сомониро додааст. Ҳамин тавр аввалҳои моҳи майи соли 2016 Б.Ғ. шиносномаи техникии ҳавлидориро ба номи Н.А. омода намуда онро дар деҳаи Қаратоғи шаҳри Турсунзода ба Д.З. додааст. Б.Ғ. ба Д.З. фаҳмондааст, ки боқимонда ҳуҷҷатҳоро омода карда медиҳад. Дигар оиди ин ҳолатҳо ӯ хабар надоштааст.

Шоҳид Н.А.О. дар маҷлиси судӣ чунин нишондод дод, ки дар ҳақиқат Д.З.А. писараш мебошад. Манзили истиқоматии ӯ воқеъ дар суроғаи ноҳияи Шаҳринав, Ҷамоати деҳоти Шаҳринав, маҳаллаи Балхак ҷойгир буда аз солҳои пеш ба номи шавҳараш Д.А.Э. ҳуҷҷатгузори карда шуда будааст. Хонаи онҳо аз се ҳуҷра иборат мебошад. Соли 2012 шавҳараш вафот кардааст. Ҳамон вақт масоҳати замини онҳо расман 0,13 гаро ташкил медодааст. Лекин қитъаи замини мазкур аз солҳои пеш калон будааст. Аз ҳамин хотир соли 2016 дар хона маслиҳат кардаанд, ки қитъаи замини мазкурр пурра ҳуҷҷатгузори намоянд. Ӯ ба писараш Д.З. фаҳмондааст, ки рафта замини мазкурро ҳуҷҷатгузори намоянд. Ҳамин тавр баъди як чанд руз пас писараш Д.З. дар хона гуфтааст, ки як корманди КДФ «Бақайдгирии молу мулки ғайриманқул» дар ноҳияи Шаҳринав Б.Ғ. қитъаи замини наздиҳавлигиро пурра ҳуҷҷатгузори мекунад. Моҳи апрели соли 2016 ӯ бо ҳамроҳи писараш Д.Ғ. ба идораи КДФ «БММҒ» дар ноҳияи мазкур рафтаанд ва ӯ дар онҷо дар ариза имзо гузоштааст. Дар онҷо Б.Ғ. иброз намудааст, ки ҳуҷҷатҳои мазкурро омода карда ба писараш Д.З. медиҳад. Ҳамин тавр чанд сол гузашт. Дар ин муддат Б.Ғ. танҳо шиносномаи техникии ҳавлидориро омода карду халос ва дигар ҳуҷҷатҳоро тайёр накардааст. Баъдан соли 2020 боз писараш Д.З. як ариза оварда гуфтааст, ки ин ариза ба номи раиси ноҳия дар хусуси гирифтани қарори замин мебошад ва ӯ дар он ариза имзо гузоштааст. Соли 2022 боз писараш парвандаи заминсозиро овардааст ва ӯ дар он имзои худро гузоштааст боз имзои ҳамсояашро гирифтааст. Баъдан моҳи сентябри соли 2022 писараш Д.З. ӯро ба корхонаи дар боло зикршуда бурд ва ӯ барои гирифтани сертификати ҳуқуқи замин имзо гузоштааст. Пас аз чанд руз Б.Ғ. ба ӯ ҳамаи ҳуҷҷатҳо аз қабили шиносномаи техникии ҳавлидорӣ, парвандаи заминсозӣ, ки дар он боз қарори раиси ноҳияи Шаҳринав дар хусус вобаста намудани қитъаи замини наздиҳавлигӣ буд ва шаҳодатнома дар бораи бақайдгирии давлатии қитъаи заминро додааст. Моҳи феврали соли 2023 писараш бо нияти қонунигардонии молу мулк ҳуҷҷатҳоро боз ба Б.Ғ. дод лекин аз сабабҳои ноъмалум Б.Ғ. корро иҷро накард. Баъдан боз Б.Ғ. ҳуҷҷатҳои мазкурро ба ӯ баргардонида додааст. Ҳаминро бояд қайд намояд, ки ӯ пасон фаҳмидааст, ки Б.Ғ. барои ҳуҷҷатгузори намудани қитъаи замини онҳо аз писараш Д.З. маблағи 15300 сомонӣ гирифта будааст. Дар ин хусус ӯ пештар ягон маълумот надоштааст. Ягон маротиба писараш ба ӯ нагуфта будааст, ки ба Б.Ғ. барои ҳуҷҷатгузори маблағи пули додааст.

        Шоҳид А.А.Ю. дар маҷлиси судӣ чунин нишондод дод, ки аз моҳи августи соли 2019 то инҷониб дар вазифаи муовини директори КДФ «Бақайдгирии молу мулки ғайриманқул» дар ноҳияи Шаҳринав кор карда истодааст. Тартиби омода намудани шиносномаи техникии ҳавлидорӣ дар корхонаи КДФ «БММҒ» дар ноҳияи Шаҳринав дар асоси аризаи шаҳрванд, ки ба корхонаи мазкур ворид мегардад, ба мутахассиси шуъбаи баруйхатгирии техники барои барраси пешниҳод карда мешавад. Баъдан мутахассис дар маҳал манзили истиқоматиро ченак гузаронида шиносномаи техникии ҳавлидориро омода менамояд. Вобаста ба пардохти ҳаққи хизматрасони аз руи иншоотҳои сохташуда, ки дар қитъаи замин ҷойгир мебошад муайян карда мешавад. Аз ҷониби шаҳрванд бо аризаи пешниҳод гардида номуги ҳуҷҷатҳо аз қабили шиносномаи шаҳрванд ва маълумотнома аз Ҷамоат оиди қитъаи замини наздиҳавлигӣ замима мегардад. Тартиби омода намудани парвандаи заминсозӣ дар корхонаи мазкур чунин тарз омода карда мешавад. Шаҳрванд оиди вобаста намудани қитъаи замини наздиҳавлигӣ бо ариза ба мақомоти иҷроияи ҳокимияти давлатии ноҳия муроҷиат менамояд. Баъдан аризаи мазкур бо замимаи шиносномаи шаҳрванд ва маълумотнома аз Ҷамоат барои барраси ба Кумитаи идораи замини ноҳия пешниҳод карда мешавад. Минбаъд аризаи мазкур аз ҷониби Кумитаи идораи замин ба КДФ «БММҒ» ирсол карда мешавад. Аз ҷониби роҳбари корхонаи мазкур аризаи мазкур ба мутахассиси шуъбаи заминсозӣ барои барраси вогузор карда мешавад. Мутахассиси шуъбаи заминзосӣ дар маҳал қитъаи замини наздиҳавлигиро ченак гузаронида санади комиссия ва нусха аз харитаро тартиб дода аз ҷониби аъзоёни комиссия, ки иборат аз муовини кумитаи идораи замин, директори КДФ «БММҒ» дар ноҳия, сармеъмори ноҳияи, сардори хоҷагии оби ноҳия, раиси Ҷамоати деҳоти Шаҳринав, муҳандис-заминсозӣ Ҷамоат, шаҳрванд ва ҳамсояҳо бо имзо ва муҳр тасдиқ карда мешавад. Баъди тасдиқи аъзоёни комиссия пешниҳоди Кумитаи идораи замин барои қабули қарори дахлдор ба мақомоти ноҳия ирсол карда мешавад. Дар асоси ҳуҷҷатҳои пешниҳод гардида қарори раиси ноҳия оиди вобаста намудани қитъаи замини наздиҳавлигӣ ба имзо мерасад. Баъди ба имзо расидани қарори мазкур аз тарафи мутахассиси шуъбаи заминсозии КДФ «БММҒ» протокол ва нақшаи дар маҳал тартиб дода шуда аз тарафи комиссия имзогузори карда мешавад. Парвандаи заминсозӣ аз ҷониби мутахассис пурра тартиб дода шуда барои додани хулоса ба мутахассиси эксперти корхона пешниҳод мегардад. Баъди додани хулосаи экспрет парвандаи мазкур ба бойгонии корхона иросл карда мешавад. Баъдан аз ҷониби шаҳрванд бо ариза дар хусуси омода намудани шаҳодатнома дар бораи бақайдгирии давлатӣ ба шуъбаи бақайдгири муроҷиат менамояд. Аз ҷониби шуъбаи бақайдгирии давлати парвандаи заминсозиро омухта сипас шаҳодатнома дар бораи бақайдгирии давлатиро қабул менамояд. Сипас ҳуҷҷати мазкур ба шаҳрванд дода мешавад як нусхаи он дар бойгонии корхона нигоҳ дошта мешавад. Вобаста ба шиносномаи техникии ҳавлидории шаҳрванд Н.А., №2033, сокини ноҳияи Шаҳринав, Ҷамоати деҳоти Шаҳринав, деҳаи Балхак, чунин гуфтааст, ки манзили истиқоматии мазкур қаблан ба Д.А. таалуқ дошта, соли 2007 ба номбурда шиносномаи техники омода карда шуда буд. Баъдан дар асоси шаҳодатномаи ҳуқуқ ба мерос аз руи қонун аз 17 сентябри соли 2012, №4м-41 манзили истиқоматӣ ҳамчун мерос ба ҳамсари марҳум Н.А. гузаронида шудааст. Сипас санаи 26 апрели соли 2016 шаҳрванд Н.А. ба корхонаи мазкур бо ариза оиди гузаронидан таъғироти ҷори, яъне бинобар сабаби таъғир ёфтани масоҳати қитъаи замин, ки қаблан 0,13 га буд ва масоҳати 0,37 га ҳамроҳ карда дар маҷмуъ 0,50 гаро ташкил дод, ки аризаи мазкур барои барраси ба мутахасиси шуъбаи баруйхатгири Б.Ғ. вогузор карда шудааст. Аз тарафи номбурда санаи 27 апрели соли 2016 шиносномаи техникии ҳавлидорӣ шаҳрванд Н.А. тартиб дода шудааст. Аз руи шиносномаи техники ба номи Н.А. дида мешавад, ки пардохти ҳаққи хизматрасонии корхона маблағи 380 сомониро ташкил медиҳад. Пас аз ин санаи 27 октябри соли 2020 шаҳрванд Н.А. ба раиси ноҳияи Шаҳринав барои вобаста намудани қитъаи замини наздиҳавлигиаш муроҷиат намудааст. Аризаи мазкур санаи 28 октябри соли 2020 барои барраси ба Кумитаи идораи замин, баъдан санаи 30 октябри соли 2020 ба корхони мазкур ворид гардид. Аризаи мазкур аз ҷониби роҳбарият барои баррасӣ ба мутахассиси шуъбаи заминсозӣ Қ.М. вогузор карда шудааст. Аз ҷониби мутахассиси мазкур дар маҳал қитъаи замин ченак гузаронида шуда санади коммиссия аз 05 январи соли 2021 тартиб дода шуда аз ҷониби комиссия имзогузори карда шудааст. Баъдан аз ҷониби Кумитаи идораи замини ноҳия пешниҳод аз 26 августи соли 2021, №1/2-2665 (4.17) ба раиси ноҳия равон карда шудааст. Вобаста ба ҳуҷҷатҳои пешниҳодгардида қарори раиси ноҳия аз 09 июни соли 2022, №310 дар бораи вобаста намудани қитъаи замини наздиҳавлигии шаҳрванд Н.А. дар майдони умумии 0,50 га ба имзо расонида шуд. Баъдан мутахассиси шуъбаи заминсозӣ Қ.М. санаи 26 июни соли 2022 протокол ва нақшаи дар маҳал тартиб дода шуда аз ҷониби комиссия ба имзо расонида шуд. Сипас шаҳрванд Н.А. тибқи расиди №359 аз 24 июни соли 2022 маблағи 1093,18 сомони дар бонк пардохт намудааст. Баъдан парвандаи заминсозӣ ба пуррагӣ аз ҷониби мутахассис Қ.М. омода карда шуда ба мутахассиси эксперт равон карда шудааст. Мутахассиси эксперт санаи 01 августи соли 2022, №0403 барои дуруст будани ҳуҷҷатҳои заминсози хулосаи худро бароварда ба бойгони пешниҳод намудааст. Шаҳрванд Н.А. як нусхаи парвандаи заминсозиро аз бойгон гирифта санаи 14 сентябри соли 2022, №554 ба шуъбаи бақайдгири оиди гирифтани шаҳодатнома бо пардохти ҳаққи хизматрасони 261 сомони маблағ супорида аз тарафи шуъбаи бақайдгири санаи 15 сентябри соли 2022, №4801 шаҳодатнома дар бораи бақайдгирии давлати омода карда шуда ба шаҳрванд Н.А. шаҳодатномаи мазкур дода шудааст. Оиди ин ҳолат ҳаминро қайд кардааст, ки Б.Ғ. ягон маротиба дар хусуси гирифтани маблағ аз шаҳрванд Д.З. ба ӯ чизе нагуфта будааст. Ӯ дар рафти санҷиш маълумот пайдо намудааст, ки Б.Ғ. аз шаҳрванд Д.З. барои омода намудани ҳуҷҷатҳои манзили истиқомати ба номи Н.А. маблағи 15300 сомонӣ гирифта будааст. Инчунин дар ин давра ягон маротиба шаҳрвандон Н.А. ё Д.З. ба ӯ дар хусуси додани маблағ ба Б.Ғ. чизе нагуфта буданд. Шахсан ӯ ин шахсонро намешиносад. Лекин ҳаминро бояд қайд намояд, ки дар ҳақиқат дар моҳи июни соли 2022 Б.Ғ. ба наздаш даромада протокол ва нақшаи заминро аз санаи 24.06.2022 оварда аз ӯ хоҳиш намудааст, ки дар он имзо гузорад. Ӯ баъди омухтани тамоми ҳуҷҷатҳои мазкур баъдан дар утоқи кориаш имзо гузоштааст. Ҳамон вақт Б.Ғ. ба ӯ ягон хел маблағ надода будааст. Ӯ дар асл дар маҳал нарафта замини мазкурро аз наздик надида дар ин ҳуҷҷатҳои мазкур ба номи Н.А. имзо гузошта будааст.

         Шоҳид К.Ҷ.С. дар маҷлиси судӣ чунин нишондод дод, ки ӯ аз моҳи сентябри соли 2022 то инҷониб дар вазифаи сардори шуъбаи бақайдгирии  КДФ «Бақайдгирии молу мулки ғайриманқул» дар ноҳияи Шаҳринав кор карда истодааст. Дар ҳақиқат моҳи сентябри соли 2022 аз ҷониби мутахассиси шуъбаи бақайдгирии корхонаи мазкур Д.Ш. барои омода намудани шаҳодатнома дар бораи бақайдгирии давлатӣ ба номи Н.А. пешниҳод шуда буд. Ҳамон вақт ба наздаш сардори шуъбаи баруйхатгирии техникии корхонаи мазкур Б.Ғ. ба наздаш омада хоҳиш намудааст, ки Н.А. шиносаш мебошад ва аз ӯ хоҳиш намуда будааст, ки шаҳодатномаи мазкурро тезтар омода намояд. Ӯ ҳамон вақт ба Б.Ғ. фаҳмонда будааст, ки дар сурати пурра ва дуруст будани ҳуҷҷатҳои мазкур ӯ шаҳодатномаи мазкурро омода мекунад. Баъдан аз ҷониби ӯ ҳуҷҷатҳои мазкур пурра санҷида шуд ва санаи 15 сентябри соли 2022 шаҳодатнома дар бораи бақайдгирии давлатиро ба номи Н.А. омода намудааст.Бояд ҳаминро қайд кунад, ки Б.Ғ. ба ӯ ягон хел маблағ надода будааст. Шаҳрванд Н.А.ро бошад ӯ умуман намешиносад ва ягон бор надида будааст. Ӯ дар рафти пурсиш маълумот гирифтааст, ки Б.Ғ. барои омода намудани ҳуҷҷати замин аз писари Н.А., Д.З. маблағи 15300 сомонӣ гирифта будааст. Чи хеле ӯ дар боло қайд кардааст ӯ дар ин хусус ягон маълумот надоштааст. Чунки дар хусуси гирифтани маблағ аз тарафи Б.Ғ. ӯ ягон маълумот надоштааст. Ғайр аз ин дар ин муддат ягон маротиба шаҳрвандон Н.А. ва Д.З. дар хусуси ба Б.Ғ. додани маблағи пули ба ӯ муроҷиат накарда буданд. Дигар ӯ дар ин хусус ягон маълумот надорад.

Шоҳид С.Ҳ.П. дар маҷлиси судӣ чунин нишондод дод, ки ӯ аз моҳи январи соли 2022 то инҷониб дар вазифаи раиси Ҷамоати деҳоти Шаҳринави ноҳияи Шаҳринав кор карда истодааст. Вобаста ба ҳолати кор ҳаминро қайд менамудааст, ки дар ҳақиқат моҳҳои июни соли 2022 корманди КДФ «БММҒ» дар ноҳияи Шаҳринав Б.Ғ.А. ба наздаш ба ҷои кор омада ба ӯ фаҳмондааст, ки ба сокини маҳалаи Балхак Н.А. ҳуҷҷатҳои қитъаи заминашро омода карда истодааст ва аз ӯ хоҳиш намудааст, ки дар протоколи дар маҳал муайян намудани сарҳади қитъаи замини наздиҳавлигии шаҳрванд Н.А., воқеъ дар маҳаллаи Балхак, Ҷамоати деҳоти Шаҳринав, ноҳияи Шаҳринав аз 24.06.2022 сол ва дар нақшаи дар маҳал муайян намудани сарҳади қитъаи замини наздиҳавлигии шаҳрванд Н.А., воқеъ дар маҳаллаи Балхак, Ҷамоати деҳоти Шаҳринав, ноҳияи Шаҳринав имзо гузорад. Ӯ дар утоқи кориаш дар ҳуҷҷатҳои мазкур имзо гузошта будааст. Дар ҳақиқат ӯ бо дигар аъзоёни комиссия дар маҳал қитъаи заминро аз наздик надида дар ҳуҷҷатҳо имзо гузоштааст. Бояд ҳаминро қайд кунад, ки Б.Ғ.А. барои гузоштани имзо ба ӯ ягон хел маблағи пули надодааст. Инчунин ӯ дар рафти пурсиш фаҳмидааст, ки Б.Ғ. аз шаҳрванд Д.З. маблағи пули ба миқдори 15300 сомонӣ гирифта будааст. Дар ин муддат ягон маротиба шаҳрвандон, ки сокинони маҳаллаи Балхак мебошанд ва ӯ онҳоро ҳамчун сокини ин маҳалла мешиносад бо онҳо ягон муносибати хешу табори надорад ва онҳо низ ягон маротиба ба ӯ дар хусуси додани маблағи пули ба Б.Ғ. ба ӯ чизе нагуфта буданд.

Шоҳид Д.Ш.Д. дар маҷлиси судӣ чунин нишондод дод, ки ӯ аз моҳи январи соли 2018 то инҷониб дар вазифаи мутахассиси шӯъбаи бақайдгирии  КДФ «Бақайдгирии молу мулки ғайриманқул» дар ноҳияи Шаҳринав кор карда истодааст. Дар ҳақиқат моҳи сентябри соли 2022 сардори шуъбаи баруйхатгирии техникии корхонаи мазкур Б.Ғ. ба наздаш омада хоҳиш намудааст, ки як шиносаш бо ному насаби Н.А.ро дар хусуси омода намудани шаҳодатнома дар бораи бақайдгирии давлатӣ аризаашро қабул намояд. Ӯ ҳамон замон тариқи компютер ариза оид ба бақайдгирии молу мулки ғайриманқул ба номи Н.А.ро омода намуда пасон имзои шаҳрванд Н.А.ро дар аризаи мазкур гирифтааст. Инчунин ҳамон замон забонхат оид ба қабули ариза/дархост ба номи Н.А.ро чоп карда дар он низ имзои Н.А.ро гирифтааст. Ғайр аз ин ҳаминро бояд қайд намояд, ки ҳамон замон Б.Ғ. ба ӯ расид дар хусуси хизматрасонии корхона ба маблағи 178 сомонӣ ва расид дар хусуси боҷи давлати ба маблағи 82,64 сомониро дода буд. Ҳамин тавр ӯ ҳуҷҷатҳои мазкурро омода намуда ба шуъбаи бақайдгири супорида будааст. Бояд ҳаминро қайд кунад, ки Б.Ғ. ба ӯ ягон хел маблағ надода будааст. Инчунин ӯ ҳамон вақт аз шаҳрванд Н.А. низ ягон хел маблағи пули нагирифта будааст. Ӯ дар рафти пурсиш маълумот гирифтааст, ки Б.Ғ. барои омода намудани ҳуҷҷати замин аз писари Н.А., Д.З. маблағи 15300 сомонӣ гирифта будааст. Чи хеле ӯ дар боло қайд кардааст ӯ дар ин хусус ягон маълумот надоштааст. Чунки дар хусуси гирифтани маблағ аз тарафи Б.Ғ. ӯ ягон маълумот надоштааст. Ғайр аз ин дар ин муддат ягон маротиба шаҳрвандон Н.А. ва Д.З. дар хусуси ба Б.Ғ. додани маблағи пули ба ӯ муроҷиат накарда буданд. Дигар ӯ дар ин хусус ягон маълумот надорад.

Шоҳид Қ.М.Қ., ва Р.Р.Т, аз вақт ва маҳалли маҷлиси  судӣ ба   таври дахлдор огоҳ буд, бинобар сабабҳои ба суд номаълум ба маҷлиси   судӣ  ҳозир нагардид. Нишондоди дар рафти тафтишоти пешакӣ додаи шоҳид
Қ.М.Қ. (в.к. 125-127) ва шоҳид Р.Р.Т. (в.к. 150-152) мутобиқан ба маводҳои парвандаи ҷиноятӣ хонда эълон карда шуд, ки   судшаванда Б.Ғ.А. нишондодҳои зикргаштаро тасдиқ кард.

Аз санади ихтиёран супоридани маблағи пулӣ аз 21.02.2023 сол маълум мешавад, ки аз ҷониби судшаванда Б.Ғ.А. маблағ ба андозаи 14660 сомонӣ пурра барқарор карда шуд.(в.к. 25).

Аз забонхати  ҷабрдида Д.З.А. маълум мешавад, ки  маблағи зарар, ки судшаванда Б.Ғ.А. ба миқдори 14660 сомонӣ, дар се ҳолат гирифта буд, ба пуррагӣ ба вай барқарор карда шудааст. (в.к. 36).

Ҳамин тариқ суд дар асоси далелҳои ҷамъовардашуда ба хулоса омад, ки судшаванда Б.Ғ.А. дар вазифаи техник — баҳисобгири шуъбаи техникии КДФ “Бақайдгирии молу мулки ғайриманқул” дар ноҳияи Шаҳринав кор карданаш, моҳи апрели соли 2016 ба ӯ шаҳрванд Д.З.А., истиқоматкунандаи ноҳияи Шаҳринав, Ҷамоати деҳоти Шаҳринав, маҳаллаи Балхак дар хусуси мусоидат намудан ҷиҳати гирифтани шиносномати техникии ҳавлидорӣ, парванда заминсозӣ ва шаҳодатнома дар бораи бақайдгирии давлатии манзили истиқоматии ба номи модараш шаҳрванд Н.А.О., воқеъ дар суроғаи ноҳияи Шаҳринав, Ҷамоати деҳоти Шаҳринав, маҳаллаи Балхак муроҷиат намуд. Б.Ғ.А.  бо истифодаи мақоми хизматӣ, бо мақсади бо роҳи фиреб ва сӯиистифодаи боварӣ тасарруф намудани молу мулки ғайр, ба боварии Д.З.А. даромада, ба номбурда таклиф пешниҳод намуд, ки бар ивази маблағи 8800 сомонӣ дар муҳлати кӯтоҳ шиносномаи техникии ҳавлидорӣ, парванда заминсозӣ ва шаҳодатнома дар бораи бақайдгирии давлатии манзили истиқоматии ба номи шаҳрванд Н.А.О. омода карда медиҳад. Д.З.А. бехабар аз қасд ва мақсади ғаразноки Б.Ғ.А. ба фиреби ӯ бовар карда, ҷиҳати ба охирин пешниҳод намудани маблағи талабшуда розӣ шуд. Б.Ғ.А. қасдан ва бо мақсади ғаразнок, кирдорҳои ҷинояткоронаи худро идома дода аз Д.З.А. дар назди бинои КДФ “Бақайдгирии молу мулки ғайриманқул” дар ноҳияи Шаҳринав моҳи апрели соли 2016 маблағи 8800 сомониро гирифта, танҳо 380 сомонии онро ҳамчун хизматрасонӣ ба бонк супорида, боқимонда маблағи 8420 сомониро ба манфиати худ сарф карда, 27 апрели соли 2016 шиносномаи техникии ҳавлидориро ба номи Н.А.О. омода карда, онро дар деҳаи Қаратоғи шаҳри Турсунзода ба Д.З.А. дода, ба охирон ваъда кард, ки барои омода намудани боқимонда ҳуҷҷатҳои манзили истиқоматӣ кумак мерасонад. Минбаъд Б.Ғ.А. дар вазифаи сардори шуъбаи баруйхатгирии техникии корхонаи дар болозикршуда кор карданаш, кирдорҳои ҷинояткоронаи худро давом дода, бо мақсади ба даст овардани маблағи муфту безаҳмат бо сӯиистифодаи боварӣ, бо қасди умумӣ ва мақсади ягон амал карда, ба маблағи 8420 сомонии аз Д.З.А. гирифтааш қаноат накарда, нақшаи ҷиноятпешаи худро таҳрезӣ намуда, моҳи майи соли 2021 аз Д.З.А. барои мусоидат намудан ҷиҳати омода намудани парвандаи заминсозӣ ва шаҳодатнома дар бораи бақайдгирии давлатӣ ба номи Н.А.О. боз аз охирин овардани маблағи 10 000 сомониро талаб кард.Бо назардошти он ки Д.З.А. имконияти додани чунин маблағро надошт, бо хоҳиши охирин Б.Ғ.А. маблағи талабнамудаашро то 8500 сомонӣ кам намуд ва минбаъд Д.З.А. бехабар аз мақсади ҷиноятпешаи Б.Ғ.А. барои додани маблағ розӣ шуд.Б.Ғ.А. қасдан ва бо мақсади ғаразнок, нақшаи ҷинояткоронаи худро идома дода аз Д.З.А. дар ду ҳолат маротибаи аввал дар назди филиали бонки “Эсхата”-и ноҳияи Шаҳринав моҳи майи соли 2021 маблағи 3500 сомонӣ ва маротибаи дуюм моҳи ноябри соли 2021 дар назди бинои КДФ “Бақайдгирии молу мулк ғайриманқул” дар ноҳияи мазкур маблағи 3000 сомонӣ, ҷамъ маблағи 6500 сомониро гирифта, танҳо 260 сомонии онро ҳамчун хизматрасонӣ ба бонк барои омода намудани парвандаи заминсозӣ ва шаҳодатнома дар бораи бақайдгирии давлатӣ пардохт карда, боқимонда маблағи 6239 сомониро ба манфиати худ сарф кард.Дар маҷмуъ Б.Ғ.А. бо роҳи фиреб аз шаҳрванд Д.З.А. маблағи 15300 сомониро гирифта, аз он танҳо маблағи 640 сомонӣ барои хизматрасонӣ ба бонк пардохт карда, боқимонда маблағи 14660 сомониро ба эҳтиёҷоти шахсиаш сарф намудааст, ки бо ин  кирдорҳои қасдонаи худ ба охирин зарари моддӣ ба миқдори калон расонидааст.

Аз ин рӯ суд ҳаракатҳои судшаванда Б.Ғ.А.-ро бо банди “а”-и қисми 3-и моддаи 247-и КҶ Ҷумҳурии Тоҷикистон бо аломатҳои тасарруфи молу мулки ғайр ё ба даст овардани ҳуқуқ ба молу мулки ғайр, бо роҳи фиреб ё сӯиистифодаи боварӣ ба миқдори калон банду баст менамояд.

Дар вақти таъин намудани ҷазо нисбати судшаванда Б.Ғ.А. суд хавфнокии ҷамъиятии ҷиноятро, ки қасдона содир карда шудааст, принсипи фардикунонии ҷазоро, шахсияти судшавандаро, ки худашро дар содир намудани ҷиноят гунаҳгор шуморида, пушаймонӣ изҳор намуданашро, ба тафтишоти судӣ барои ҳалли объективонаи парванда ёри доданашро, пеш суд нашуданашро, аз ҷои зисташ хислатномаи мусбӣ доштанашро, соҳиби 2 фарзанди хурдсол буданашро, пурра барқарор намудани зарари расонидашуда ба ҷабрдидаро, ҷавонияшро, ба назар гирифта, лозим донист, ки дар доираи раводиди қисми 3-и моддаи 247-и КҶ Ҷумҳурии Тоҷикистон ҷазо таъин намояд.

Суд ҳолатеро, ки судшаванда ба гуноҳаш пурра иқрор буда, аз кардааш пушаймон мебошад, дар таъминоташ 2-нафар фарзанди хурдсол доштанашро, пеш суд нашуданашро, пурра барқарор намудани зарари расонидаашро ҳамчун ҳолатҳои мустаснои кор эътироф намуда, лозим донист, ки нисбати ӯ моддаи 63-и КҶ Ҷумҳурии Тоҷикистонро татбиқ намуда, дар ҳаққаш ҷазоро аз ҳадди каме, ки қонун барои ҷинояти содирнамудаи ӯ пешбинӣ мекунад, камтар таъин намояд.

Суд таъини ҷазои иловагиро дар намуди маҳрум кардан аз ҳуқуқи ишғоли мансабҳои муайян ё машғул шудан ба фаъолияти муайянро муҳокима намуда, лозим донист, ки ин намуди ҷазоро нисбати ӯ таъин накунад, зеро судшаванда Б.Ғ.А. зарари расонидаашро ба пуррагӣ талофӣ намудааст, ба гуноҳаш пурра иқрор буда, ба тафтишоти пешакӣ ва судӣ барои ҳалли объективонаи кор ёрӣ додааст.

Гарчанде, ки тибқи талаботи моддаи 23-и Қонуни Ҷумҳурии Точикистон “Дар бораи буҷети давлатии Ҷумҳурии Тоҷикистон барои соли 2023” аз 07.12.2022 сол таҳти №1916 аз 01.01.2023 сол як нишондиҳанда барои ҳисобҳо баробар ба 68 сомонӣ муқаррар карда шуда  бошад ҳам, суд лозим донист ҷазои ҷаримаро нисбати судшаванда Б.Ғ.А. аз рӯи нишондиҳанда барои ҳисобҳо, ки баробар ба 60 сомонӣ дар вақти содир намудани ҷиноят муқаррар карда шуда буд, таъин намояд, зеро мутобиқи талаботи қисми 1-и моддаи 12-и КҶ Ҷумҳурии Тоҷикистон ҷиноят ва сазовори ҷазо будани кирдор бо қонуне, ки дар вақти содир намудани он кирдор, амал мекунад, муайян карда мешавад.

Суд бо дастрасии моддаи 78-и КМҶ Ҷумҳурии Тоҷикистон тақдири далелҳои шайъиро ҳал намуд.

Бинобар асосҳои болоӣ бо дастрасии моддаҳои 332-335, 338-339, 341-344, 347-348-и КМҶ Ҷумҳурии Тоҷикистон суд чунин,-

Ҳ У К М  К А Р Д :

Б.Ғ.А. бо банди «а»-и қисми 3-и моддаи 247-и КҶ Ҷумҳурии Тоҷикистон гунаҳгор дониста шавад.

Нисбати ӯ бо ҳамин модда бо дастрасии моддаи 63-и КҶ Ҷумҳурии Тоҷикистон ҷазо дар намуди ҷарима ба андозаи 300 (сесад) нишондиҳанда барои ҳисобҳо баробар ба 18000 (ҳаждаҳ ҳазор) сомонӣ ба фоидаи давлат таъин карда шавад, бидуни маҳрум кардан аз ҳуқуқи ишғоли мансабҳои муайян ё машғул шудан ба фаъолияти муайян.

Чораи пешгирии Б.Ғ.А. дар намуди забонхат дар бораи нарафтан аз маҳалли истиқомат баъди ба қувваи қонунӣ даромадани ҳукм бекор карда шавад.

Далелҳои шайъи шиносномаи техникии ҳавлидорӣ, парвандаи заминсозӣ ва шаҳодатнома дар бораи бақайдгирии давлатӣ ба номи шаҳрванд Н.А.О. дар қабати маводҳои парвандаи ҷиноятӣ мебошад ба парванда ҳамроҳ карда шавад.

Нисбати ҳукм дар муддати 10 (даҳ) шабонарӯз ба воситаи ҳамин суд ба Суди Олии Ҷумҳурии Тоҷикистон шикоят ва ё эътироз баён намудан мумкин аст, ба истиснои асосҳои яктарафа ё нопурра будани тафтиши судӣ ва мувофиқат накардани хулосаи суд, ки дар ҳукм баён шудаанд ба ҳолатҳои воқеии парванда.

Судяи суди ноҳияи Шаҳринав:                                                       Аюбзода Н.С.